Gəlib məndə girələnən ömrümün,

Gəlib məndə girələnən ömrümün, Zülüm-zillət,çər dayanıb başında. Nə müddətdi kefi yoxdu könlümün, Dərd dayanıb-sər dayanıb başında.

Neçə dəfə batırdılar batmadım Bir adamın kölgəsində yatmadım, Mən bu yaşa elə-belə çatmadım, Ağır zəhmət,tər dayanıb başında..

Heç kimiyəm özgələrin,özlərin, Odu sönməz içimdəki közlərin, İtə-qurda əymədiyim sözlərin, Bir yenilməz nər dayanıb başında.

Nə xəyalım bir iblisnən çuğlaşar, Nə harama əl-ayağım bulaşar, Əvvəl-axır qurda-quşa ulaşar, Bir karvan ki,xər dayanıb başında.

Göz bağlamaq,ağız yummaq olarmı, Bu qədər də çox umsunmaq olarmı, Ayağından xeyir ummaq olarmı, Bir şeyin ki,şər dayanıb başında..

Ahım tutub o qaboyu oynama, "Vağzalı"sı qanlı toyu oynama, Sən heç onu ömrü boyu oynama, O oyun ki,zər dayanıb başında..

Əyninizə alovları geyin ki!!! Odu canı,odu təni,deyin ki... Mənə verin bu Vətəni,deyin ki... Bir ər oğlu ər dayanıb başında..