Neynəmişəm, yar mənə, pis-pis baxır,

Neynəmişəm, yar mənə, pis-pis baxır, Sevgili dildar mənə pis-pis baxır..

Qışda da qəlbimdə bahar görsənir, Şaxta, soyuq, qar mənə pis-pis baxır.

Könlümü dilləndirirəm ney kimi, Telli qopuz, tar mənə pis-pis baxır..

Bir qıza söz atmışam illər qabaq, İndiyəcən ar mənə pis-pis baxır.

Dilbərin ol tənəsi qurtarmamış, Üstəgəl, əğyar mənə pis-pis baxır.

Bağçada quyruq bulayır bağbana, Amma di gəl, xar mənə, pis-pis baxır.

Mən deyirəm ölkəni çox sağmayın, Bir neçə maldar mənə pis-pis baxır.

Bir kərə həq söz demişəm fanidə. Hər dəfə hünkar mənə pis-pis baxır.