Bacarsan arada,özünü qına,

Bacarsan arada,özünü qına, Mənsiz yaşadığın illəri deyil.. Ən gözəl,ən isti sözləri sına, Day,qəlbim piano dilləri deyil.

Day qəlbim,piano dilləri deyil, Bir də o nəğməni ötməz heç zaman.. O ipək,o ürkək əllərin də bil, Yaramın üstünü örtməz heç zaman..

Bir vaxtlar çəmənli-çiçəkli idik, İndi iki gözün iki buluddu.. Nə olsun hamıdan ürəkli idik, Bizi də həsrətin timsahı uddu.

Hardadı bəs indi,o ləl,o gövhər, Min-min ad içində itibdi adın.. Yüz dəfə doluxsun,min dəfə kövrəl, Yoxdu o əvvəlki çiyələk dadın.

Mən indi heç kiməm,sən indi heç kim, Küləklər xətrini çətin qaytara.. Bir də o sevginin,bir də o eşqin, Rəngini,ətrini çətin qaytara.

Hayıf o,günlərdən,hayıf,çox hayıf, Dağıldı sarayı,uçdu hasarı. Qaytara biləcək heç nə qalmayıb, Məni sən olduğun keçmişə sarı.