Göyü də duman basıb,

Göyü də duman basıb, Ayı-ulduzu yoxdu. Qaçıb hər şeyin dadı, Heç nəyin duzu yoxdu.

Yoxdu doğan-bələyən, On gözündən ələyən.. Ürəyimdi mələyən, Ayrı bir quzu yoxdu.

Töksən bir ovuc qanam, Bir təndə iki canam, Ağlama,a-atam-anam, Yazıya pozu yoxdu..

Kim yetəcək köməyə, Əcəl gəlir yeməyə, Durub nəsə deməyə, Heç kimin üzü yoxdu.

Odu sönüb ahın da, Boğul öz günahında, Bu yerdə Allahın da, Adı var,özü yoxdu..