Gör nə qədər cırıq-sökük gözləyir,

Gör nə qədər cırıq-sökük gözləyir,Gör nə qədər iynə-sapdan qalmışam.Gör nə qədər buraxmışam fürsəti,Gör nə qədər haqq-hesabdan qalmışam..

Nə olsun ki,xeyir oğlu,xeyirəm,Bəd ayaqda qabağımdan yeyirəm,Artıq-urtuq elə baxır deyirəm,Allah bilir hansı qabdan qalmışam..

Könlüm çoxdan köhlənlərə süvardı,Amma hər yan keçilməyən divardı,Unutmağa bir kəs olsa nə vardı..Neynim axı,belə lapdan,qalmışam.

Ala dağa, Sarıgölə çıxmıram,Öz canımdan ölə-ölə çıxmıram,Xeyli vaxtdı,evdən çölə çıxmıram,Dost-tanışdan,sözdən-gapdan qalmışam.

Xoflanıram,dörd tərəfdən dörd gözəm,Həm sobayam,həm maşayam,həm közəm..Dərd əlində çulu cırıq bir sözəm,Cildi köhnə bir kitabdan qalmışam..