Dünənəcən göbək atan bir xanım,

Dünənəcən göbək atan bir xanım, Şükür daha,hicablanıb,şallanıb. Günmü belə başımıza çox döyüb, Elə bil ki,hamı bir az hallanıb..

Sirk açırıq hansı ayı xətrinə, Yüksəlirik əmi-dayı xətrinə, Bu ölkədə tulapayı xətrinə, Qızıl kimi həqiqətlər lallanıb.

Diz qalmayıb birimizdə iməkdən, Kim bay olub qara işdən-əməkdən, Çoxusunun haram tikə yeməkdən, Buxaqları xortum kimi sallanıb.

Bilən varmı nəyi necə sağaldaq, Bu nimdaşdı,bu qocadı,bu qaltaq, Kürsülərdə tox görünən o yaltaq, Quyruğunun hesabına yallanıb.

Çıxammırıq bir lənətin girindən, Böyüdürlər yazan kimi birindən, Kim əl çəkər öz xoşuna yerindən, Vəzifələr indi-indi ballanıb.

Sızlasa da,ağlasa da yalandan, Məmləkətdə satan çoxdu alandan, Boz eşşəklər qurtulubdu palandan, Ucdantutma yəhərlənib-nallanıb...