Açıq idi qapın-bacan, pəncərən,

Açıq idi qapın-bacan, pəncərən, Gəldim-getdim,qorxun-hədən olmadı.. Ünvanımı ürəyinə köçürdüm, Ürəyimdə başqa vətən olmadı..

Baxışları utancağım, həyalım, Qədəmləri mübarəkim, sayalım, Yanındaydı bütün günü xəyalım, Deyirsən ki, gəlib-gedən olmadı..

Bələmirəm sözlərimi sədəfə.. Sadəcə sən düz atmırsan hədəfə, İçib getdim yadımdadı bir dəfə, Ayrı səbəb,ayrı nədən olmadı..

Böyüsə də,uzansa da ərzimiz, Birdən-birə alt-üst oldu tərzimiz, Bu eşqi də dar tikmişdi dərzimiz, Bu sevgi də böyükbədən olmadı.

Lap qoy olsun Allah andın-din andın, İndən belə nə xeyri var min andın, Kim nə dedi tez-tələsik inandın, Düşünməyə vaxtın-vədən olmadı..

Danışmıram bir dilbilməz lalla,ha.. Unudaram,vallahamı-vallaha.. Mən ağrıdım səsim çıxdı Allaha, Sənin məndən yaran-zədən olmadı.

Çox azalıb ürəyimin qidası.. Əlindədi ayrılığın nidası, Bu dəfəki əlvidanın vidası, Çox şükür ki, "ki"dən, "və" dən olmadı.